有性趣：便秘會傷腎？

大家真係唔可以輕視便秘呢個問題，因為便秘會引致毒素喺體內堆積，造成內分泌紊亂，另外一項大型研究，觀察了350萬患者，經過觀察分析之後得出嘅結果係，便秘患者有更高嘅慢性腎病發生率，所以排便同腎功能可以話息息相關，亦因為咁，男士如果面對便秘問題，記住要睇醫生對症下藥喇！此外，亦要注意以下事項，以預防便秘問題：

1. 保持運動習慣

運動量過少長時間坐喺度，就會導致腸道蠕動減少，繼而出現便秘問題，所以幾忙都好，一定要養成運動習慣，最好係能夠每周進行3至5次，每次30分鐘以上嘅運動。

2. 注意飲食

有得食先有得屙，但係要排便暢通，咁就一定要注意飲食，以及攝取足夠嘅膳食纖維分量喇！大家每日要進食300至500克蔬菜以及150克粗雜糧，從中攝取膳食纖維，利用其刺激腸道蠕動嘅功用嚟預防便秘。

3. 飲水充足

飲水飲得太少，除咗會令小便唔暢順，亦有機會引起便秘，因為充足嘅水分可以令大便更加濕潤，減少大腸排出便便時遇到嘅阻力，而適當嘅分量大約係1.6公升清水。