有性趣：呼吸益腎法

肺氣強 腎氣強

嚴格嚟講，床上運動都係運動，唔夠氣，表現自然打折扣，事關肺氣強盛，腎氣唔會差得去邊，所以平時不妨刺激吓同肺經有關嘅穴位，亦可以嘗試練習「呼吸益腎法」，以增加腎氣。

古老回春術之一

唔講唔知，呼吸益腎法屬於中國古老回春術之一，簡單啲講，即係「吐故納新」，將污氣吐出體外，再將新鮮空氣吸入體內。練習時，先吸一口氣，吸氣時將肩部收緊上提，腹部收縮，肛門肌肉也緊緊地收縮，盡量將三角地帶提起，當吸氣達極限之後，就慢慢吐氣，肩部、腹部、肛門肌肉亦緩緩放鬆。

每日可練十數次

換句話講，呼吸益腎法即係深呼吸加上提肛術，後者又稱「撮穀道」，屬於道家嘅養生方法之一，被認為有養腎生精功效。至於練習深呼吸可令肺活量增大，令呼吸起嚟更暢順，而肺和腎係一氣相連，當肺功能增強，腎功能亦會受惠。呼吸益腎法每日可進行十數次，做完之後，仲會有種神清氣爽嘅感覺。