有性趣：雞蛋加人參久戰不洩？

講到古怪嘅壯陽偏方，當然要睇作者及著作年代均不詳嘅奇書《毓麟驗方》，而「舌底藏春」正係出自其中，材料只有雞蛋同人參兩種，但係製法一啲都唔簡單。先將人參切粒備用，然後喺雞蛋頂部開一個小孔，取出蛋白保留蛋黃，將人參塞入蛋中並封實，再混喺雞巢內，待巢中其他雞蛋孵出雞仔後，取出「加料雞蛋」，將當中嘅人參烘乾便可。

服用方法係喺行房前，取出一粒人參藏於舌頭底下，據書中稱「春意勃然，不可名狀」，又謂「採戰不洩更妙」。雖然壯陽效果講到相當勁，但係大家要留意喺製作過程中，蛋黃可能會受病菌感染或變質，食咗嘅話肯定會出事，真係千祈唔好亂試！話說回來，被喻為「百草之王」嘅人參，一直被視為壯陽妙品，原因係佢具有調節中樞神經系統、提升抵抗力、增強心血管系統等作用。不過將咁貴重嘅藥材咁樣製法，倒不如好好食用更為有效囉！