有性趣：江瑤柱滋陰補腎

江瑤柱屬蚌類，有多個別名，包括扇貝柱、乾瑤柱、瑤柱、乾貝、玉珧等，被列為「海八珍」之一，主要產於中國、日本、越南等國家。

喺中醫學角度，江瑤柱味甘、鹹，性溫，據《中國海洋藥物》同《中國本草圖錄》記載，佢具有滋陰、調中、補腎等作用，各位男士如果喺過去一年做嘢做到身心疲倦，覺得體質弱咗好多嘅話，不妨煮番一味江瑤柱菜式嚟補一補身喇！

江瑤柱含蛋白質、碳水化合物、核黃素、鈣、磷、鐵等多種營養成分，而且蛋白質含量高達61.8%，係雞肉、牛肉、鮮蝦嘅3倍，礦物質含量亦高於魚翅、燕窩。