有性趣：食鮑魚 補腎又益精

四大海味之一

中國有四大海味，即鮑、參、翅、肚，其中鮑就係指鮑魚。鮑魚有好幾個別名，包括石決明肉、鏡面魚、明目魚、九孔螺、鰒魚等等。喺中醫角度，鮑魚味甘、鹹，性平，唔少典籍都有提及佢嘅食療功效，其中《醫林纂要》就有以下記載：「補心緩肝，滋陰明目。又可治骨蒸勞熱，解妄熱，療癰疽，通五淋，治黃疸。」而《隨息居飲食譜》更加話佢能夠補腎、益精呢！

高蛋白低脂肪

新鮮鮑魚肉質細膩彈牙，味道鮮美，而且營養豐富，蘊含嘅蛋白質高達24％，乾品鮑魚嘅蛋白質仲有成40％以上，而且佢嘅脂肪含量相當低，所以屬於高蛋白低脂肪嘅保健食品。另外，鮑魚含有20多種氨基酸，仲有一定分量嘅碘、鋅、磷、鐵、鈣等有益元素。不過，鮑魚肉較難消化，所以對於脾胃功能較弱嘅朋友嚟講，就不適宜食太多。