有性趣：浸腳按腳壯腎陽

中醫學認為腳底係各經絡起止嘅匯聚之處，有多達60多個穴位同人體內臟相連接嘅反射區，而各個反射區分別對應人體嘅五臟六腑，只要用溫水浸泡一下雙腳，除咗可以驅走寒意，更加有舒經活絡、改善血液循環嘅作用，可以為包括腎臟在內嘅臟腑帶嚟益處。對於男士嚟講，浸腳暖腎，腎陽強壯起嚟，當然有助增強床上表現！

值得一提，喺唔同時段浸腳，會起到唔同嘅補益作用。如果想健腎，最好選擇於晚上9點進行，因為喺呢段時間，身體嘅三焦經運行最暢旺，而所謂三焦包括上焦（心、肺）、中焦（脾、胃、肝、膽）同下焦（腎、大小腸、膀胱、生殖系統）。

除咗浸腳之外，大家可以透過按摩方法，刺激腳板底嘅湧泉穴，同樣可以達到強腎滋陰嘅功效。湧泉穴位於腳底前掌三分之一處，腳趾向下捲時呈現出嚟嘅凹陷位。做法好簡單，用雙手握拳，輕輕拍打湧泉穴，又或者用手指輕輕打圈按摩，令足底出現熱感就可以。