有性趣：盤龍參 添精壯陽

講起盤龍參，有好多別名，包括龍抱柱、綬草、盤龍草、雙瑚草、豬鞭草、勝杖草等等，為蘭科綬草屬植物，全草可入藥。由於佢嘅花期處於清明前後，所以又叫「清明草」。

喺中醫學角度，盤龍參味甘、淡，性平，無毒，歸心經、肺經，唔少中醫藥典籍都有提及過佢嘅功效，其中《天寶本草》就有以下嘅記載：「添精壯陽，治頭暈、腰疼痠軟。」

盤龍參除咗可以單味服用外，配上其他藥材都可以發揮唔同功效，例如治腰痛、遺精、白帶，可以用盤龍參、黑芝麻各30克，再加上黑黃豆、補骨脂、山藥、覆盆子、金櫻子各15克，炒研為末，煉蜜為丸後，早晚以開水吞服，每次9克。另外，用嚟治病後體虛，就可以用盤龍參、當歸各9克、黃芪1克，煎水服用。