有性趣：蓮蕊 治療早洩固腎

如果大家記得的話，早前曾經講過「禿雞散」，係弱雞男嘅救星，具有壯陽同提升持久力嘅功效，至於呢道「禿雞丸」嘅由來又係點呢？據《毓麟驗方》稱，古時四川有位太守服用呢道藥方後精力旺盛，因而令到老婆下體腫痛，佢一時憤怒將藥丸撒落地下，卻被公雞啄食，估唔到公雞狂性大發，跟母雞連續交合數十次，仲搞到母雞尾部甩晒毛，就係咁而得名。

材料方面，分別有肉蓯蓉、蛇床子、五味子、遠志肉、蓮蕊、木香、山藥、沉香及益智各一両，做法係將所有材料混合並碾成細末，再用煉蜜搓成藥丸便可。每次曳曳前，空肚以酒送服30粒，聲稱能提升男士性能力。

當中嘅蓮蕊，又稱蓮蕊鬚、蓮花鬚、金櫻草等，係睡蓮科植物蓮曬乾後嘅雄蕊。據明代嘉靖年間編成嘅《本草蒙筌》稱，蓮蕊具有益腎、澀精及固髓嘅作用。