有性趣：五千年性學報告

中國歷史悠長，有關性學嘅研究更係源遠流長，作者用咗超過20年時間，經廣泛整理、深入研究及反覆修訂，終於完成呢本雲集歷代中國各種性學文獻及研究嘅著作，亦因此書中內容相當詳盡。全本書共分為9章，包括講述中國歷代婚姻制度嘅「性與生活」、性愛觀嘅「性心理」、房中術剖析嘅「性行為與性姿勢」、提升性體驗嘅「性愛姿勢與技巧」、令人面紅耳熱嘅「輔助性用品」等。

內容唔止學術性，當中嘅話題更係極具趣味性，好似大家有冇聽過，龍宛轉、燕同心、魚比目、翡翠交、山羊對樹等嘅性愛體位？知唔知古代中國人點睇唔同形狀及大細嘅男士兵器？原來古代對女性私處嘅形狀居然有唔同評級？此外，古代成人詩詞、小說及春宮圖有乜嘢作用及有乜經典作品？內容嘅詳盡性，絕對令大家眼界大開。