昔日東方有性趣：海鷂魚 益腎有「營」
有啲魚類含有毒素，但偏偏有好多人都鍾意佢嘅魚肉夠鮮味，好似海鷂魚就係其中之一。可能大家好少聽到海鷂魚呢個名，其實即係魔鬼魚，別名少陽魚、荷魚、鱝魚、鯆魮魚等，相信唔少人都喺泰國菜館品嘗過，原來佢仲有益腎通淋功效，可以治療小便混濁、陰莖澀痛，可謂男人之寶！
補充蛋白質
從中醫角度而言，海鷂魚味甘、鹹，性平，歸腎經，而且營養豐富，每100克魚肉含有24克蛋白質，含量與三文魚相若，對於男人補充體力，又或者床上大戰連場後，補充番流失嘅蛋白質都相當理想。此外，佢亦含有豐富嘅維他命A、B1、B2及E，仲有鉀、鈣、鎂、鈉、鋅、磷等礦物質，而脂肪含量就出奇地低，每100克只有約0.5克脂肪，可以話係一種相當健康嘅食物。
千祈咪亂掂
海鷂魚嘅毒液來源係尾部嘅刺，一旦被刺傷會有強烈疼痛，如果被刺傷後而未及送醫治療，真係分分鐘會冇命！佢哋有時亦會出現喺香港海域，所以大家如果出海玩嘅時候見到有海鷂魚出現，就千祈唔好亂咁捉又或者同佢哋太接近，萬一畀佢條尾刺傷，後果真係可大可小，想食魔鬼魚肉都係去街市買又或者去餐廳啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
