有性趣：雞內金澀精止遺

其實雞內金係雞砂囊嘅角質內壁，屬動物類中藥，別名多多，包括雞肫皮、雞毗脛里黃皮、雞肶胵、雞肫內黃皮、雞黃皮、雞食皮、雞中金、雞合子等等。

喺中醫學角度，雞內金味甘，性平，歸胃、腎經，具有澀精止遺、健胃消食等功效，可以用於治療遺尿、遺精、食積不消等問題，對男士嚟講好有益。

根據現代藥理，雞內金含胃激素、澱粉酶、角蛋白、微量胃蛋白酶、多種維他命同微量元素，仲含有多達18種胺基酸。研究發現，服用咗雞內金嘅粉劑，胃液分泌量、酸度同消化力都有所提高，可幫助消化能力差嘅人士更易從食物中吸取營養。