有性趣：浸一浸壯陽收陰？

佢記載於北宋陳希夷所著《房術玄機中萃纂要》入面，雖然唔知當中嘅朱后係指邊位，只知道佢唔單止男女都啱使，仲要浸一浸就搞掂，確實相當神奇！藥方嘅材料亦唔複雜，當中包括細辛、川椒、蛇床子、梨花、甘草、茱萸及附子各一両，另預備幾棵葱。

做法係先將所有材料碾成細末，用5碗水煎煮，之後將藥水倒入浴盆，同時放入幾棵葱，跟住加熱水便可以進行浸浴，據稱呢道藥方具有「壯陽縮陰」嘅功效。材料中提到嘅川椒，其實即係花椒，據李時珍所著嘅《本草綱目》稱，花椒具堅齒、烏髮、明目、健胃及溫暖強壯等作用。而近年有實驗指出，多食花椒可促進生殖腺體嘅發育，只係講番呢道藥方，未免太過神奇！