有性趣：塘虱魚 滋腎興陽

塘虱魚有多個別名，包括角魚、暗釘魚、須子鯰、鬍子鯰、須手鯰、土蝨、塘角魚等等，佢嘅外貌同鯰魚好相似，所以唔少人誤以為兩者係同一種魚。喺中醫角度，塘虱魚味甘，性平，無毒，歸胃、肺、腎經，具有益氣、補腎、興陽、滋陰、養血等多種功效，食療價值可媲美魚翅同野生水魚。另外，塘虱嘅營養豐富，含有蛋白質、多種礦物質同微量元素，特別適合體弱虛損、腰膝疼痛、陽痿者食用。

食療推介：塘虱黑豆湯

材料：陳皮、60克黑豆（需浸泡約3小時）、3條塘虱魚、100克瘦肉、適量薑片

做法：將3條已劏好同洗乾淨嘅塘虱魚放入鑊，以慢火稍微煎香，再拎起備用。之後，將瘦肉、塘虱魚、黑豆、陳皮同適量薑片放入瓦煲，加入2.5公升清水，以大火煲滾後，轉慢火煲兩小時，最後加鹽調味即可飲用。

功效：強壯肝腎、養血補虛

備註：以上食療謹供參考，每個人嘅體質都唔同，食用前最好諮詢中醫師意見。