有性趣：食豆腐削弱雄風？

講法存疑

美國曾經有一項研究發現，大豆類食品包括豆腐、豆奶等，當中嘅大豆異黃酮含有植物雌激素，男性攝取太多嘅話，有機會影響男性雄風，削減精子數量。不過，之後有營養師指出，大豆食物所含嘅大豆異黃酮劑量極低，活性亦低，根本不足以對男性精子構成負面影響，所以毋須太擔心。

中醫點睇

喺中醫角度，豆腐味甘，性涼，入胃、脾、大腸經，具有益氣和中、生津潤燥、清熱解毒等功效。不過，由於豆腐性偏寒，常出現遺精嘅男士不宜多食。另外，喺正常情況下，豆腐內嘅植物蛋白質喺進入人體後會經過代謝變化，最後變成含氮嘅廢物，再由腎臟處理兼排出體外。但如果腎臟機能較弱，大量食用豆腐會加重腎臟負擔，繼而令腎功能進一步下降。