有性趣：豆角健脾補腎一絕

從中醫角度睇，豆角性平、味甘鹹，歸脾、胃經，就連「藥聖」李時珍亦謂豆角能夠「理中益氣、補腎健胃、生精髓、和五臟、調營衞」，所謂「營衞」即係指氣血，仲有滋陰養顏嘅功效，所以豆角對男女老幼一樣有益。

此外，豆角營養豐富，更有蔬菜中嘅肉類之稱，含有纖維素、維他命A、B及E、蛋白質、鉀、鈣、鐵，而且低熱低糖，非常適合減肥瘦身嘅男女。

挑選豆角時好容易揀到比較老的，除咗影響味道，仲會影響埋健脾補腎嘅功效，所以依家就教大家點揀又嫩又新鮮嘅豆角。

1.要選擇外表冇斑點及冇裂口，即使裂口好細，亦會破壞裏面嘅營養成分。

2.如果好容易將豆角去筋，就代表係又嫩又新鮮。

3.從顏色上睇，綠色嘅豆角係最新鮮，如果豆角上有黃色嘅部分，就代表係老豆角，千祈唔好買喇。

材料：豆角、豬肉

做法：將豆角去筋及洗淨後切粒，猪肉切片，加入葱、薑同蒜頭放入鑊炒熟便可。

功效：益氣補腎