有性趣：杜仲葉 補肝腎強筋骨

喺中醫角度，杜仲葉味微辛，性溫，歸肝、腎經，功效包括補肝腎、強筋骨、降血壓，對於治療肝腎不足、頭暈目眩、腰膝痠痛、筋骨痿軟等問題都有作用。最緊要使用方法夠方便，攞嚟泡茶飲用就可以，而且坊間有唔少杜仲葉茶包發售。

杜仲葉含有維他命B2、胡蘿蔔素等成分，仲有多達15種礦物質元素，包括鋅、銅、鐵、鈣、鉀、磷、鎂等等。另外，杜仲葉嘅黃酮類物質含量頗高，主要有槲皮素、槲皮素苷、紫雲英苷、山奈酚、異槲皮甙、蘆丁、陸地錦甙等，呢類成分有助抗氧化同預防心血管疾病。

值得一提，杜仲葉含有15種氨基酸，包括蘇氨酸、蛋氨酸、精氨酸、組氨酸、亮氨酸、異亮氨酸、賴氨酸、穀氨酸等等，其中精氨酸同組氨酸含量較高，而精氨酸對於改善勃起功能同預防勃起功能障礙相當有作用。