有性趣：鹿血補陽氣

之前講過，鹿全身都係寶，好多部位都對男人有補益作用，鹿血係其中之一！鹿血一般指梅花鹿或馬鹿嘅血，味甘、鹹，性熱，入肝、腎二經，自古以來都被視為名貴補品，據《本草綱目》記載：「鹿血主陽萎、補虛、止腰痛……大補虛損，益精血……」簡單啲講，鹿血具有益精血、補陽氣作用，可用於治療精血虛虧、陽氣不足、頭昏耳鳴、體倦乏力等症狀，亦好適合宮弱難穩、宮寒待孕、周期失準同計劃生育嘅女士。

喺營養方面，鹿血含有氨基酸、多種酶類、多種脂類、多種有益微量元素，可補充人體所需嘅營養物質，促進新陳代謝，提高抗疲勞嘅能力。雖然新鮮鹿血好難搵到，但坊間有利用鹿血製成嘅乾品，可以用嚟浸鹿血酒。男人長期疲勞過度，容易出現陽痿早洩，不妨試試鹿血酒。浸泡方法好簡單，先準備1公升高度白酒，將100克乾鹿血放入去浸泡，約20幾日就可以飲用，當然事前最好諮詢中醫師，畢竟每個人嘅體質都唔同，以防弄巧成拙。