昔日東方有性趣：鹿筋 生精補陽氣
自古以嚟，中國一直流傳「鹿身百寶」嘅講法，意思係鹿嘅全身都係寶，除咗鹿肉、鹿茸、鹿血、鹿尾羓之外，鹿筋更加係男人嘅恩物，事關食咗佢可以有增強雄風嘅效果。
秋冬最佳補品
鹿筋為鹿科動物梅花鹿或馬鹿四肢嘅筋，含豐富骨膠原同蛋白質。喺中醫角度，鹿筋味鹹，性溫，歸肝、腎經，食療價值高，具有補腎陽、壯筋骨、養血通絡、生精益髓之效，主治勞損過度、陽痿、遺精、風濕關節痛、子宮寒冷等症。對筋骨無力嘅人嚟講，係秋冬嘅最佳補品。
功效有根有據
事實上，唔少中醫典籍都有記載鹿筋嘅好處，例如《本經逢原》話鹿筋能「大壯筋骨，食之令人不畏寒冷。」《四川中藥志》則指出，佢可以「治風濕關節痛，手足無力及腳轉筋。」《本草求真》更加用咗「補陽」呢個字嚟形容佢嘅功效。
點樣食法？
鹿筋較牛筋細長窄身，呈金黃或棕黑色，表面有光澤，半透明，價錢亦貴好多！由於鹿筋羶味極重，所以要好好處理，先連同薑葱一起爆香，等佢膨脹後攞起，清除油質，再以清水浸泡3至4日，直至變得軟腍，咁樣做，煮製過程中就容易吸收醬汁，食落更入味。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
