有性趣：慈禧至愛鱘魚益氣補虛

鱘魚有多個別名，包括鮥、鮛鮪、尉魚、仲明魚、鱏等等，係一種食用價值相當高嘅大型魚類，除咗魚子之外，魚肉都好有益！據史書記載，垂簾聽政嘅慈禧太后好鍾意食一道叫「踏雪鱘龍」嘅宮廷菜，當中就用咗鱘魚嚟炮製，可想而知呢種食材係幾咁矜貴。

喺中醫角度，鱘魚味甘性平，歸肺、肝經，唔少中醫藥典籍都有講到佢嘅好處，例如《本草拾遺》嘅記載係「益氣補虛，令人肥健」；而《飲膳正要》則用咗「利五藏，肥美人」呢6個字嚟形容佢嘅功效，總括而言，佢對於治療久病體虛、貧血、前列腺炎有幫助。

魚類含有維他命B，有強補神經嘅作用，鱘魚肉亦唔例外，所以對於陰虧陽虛嘅早洩者嚟講，有一定食療作用。另外，鱘魚肉仲含有多種營養素，好似膠原蛋白、葡萄糖氨、軟骨素、水解氨基酸等等，而且佢所蘊含嘅Omega-3多元不飽和脂肪酸、EPA、DHA甚至比其他魚類高出3至5倍！