有性趣：枸杞葉　補虛益精

枸杞係一種好有價值嘅植物，除咗枸杞子係常見嘅藥材，枸杞葉亦有食療功效。枸杞葉有多個別名，包括地仙苗、甜菜、枸杞尖、天精草、枸杞苗等等，性涼，味苦甘，入心、肺、脾、腎四經，具有補虛益精、益腎補肝、生津止渴、祛風除濕、清熱明目等作用。

唔少中醫藥典籍都有記載枸杞葉嘅功效，好似《食療本草》嘅記載係「堅筋耐老，除風，補益筋骨，能益人，去虛勞。」《日華子本草》嘅記載係「除煩益志，補五勞七傷，壯心氣，去皮膚骨節間風，消熱毒，散瘡腫。」值得一提，枸杞葉含豐富維他命，仲有十幾種人體必需嘅氨基酸添！

枸杞葉除咗可以用嚟滾枸杞豬膶湯，仲可以用嚟泡茶飲用，可消除疲勞，促進血液循環，防止動脈硬化，預防肝臟內脂肪囤積，更有助改善體質虛寒、性冷感、健胃、肝腎疾病、肺結核、便秘、失眠等問題。