有性趣：桑寄生益肝腎

乜嘢係桑寄生？

顧名思義就係桑樹嘅寄生植物，為桑寄生科常綠小灌木植物，除咗桑樹，佢亦會寄生喺檞樹、榆樹等。另外，佢又有個別名叫「廣寄生」，因主要產生喺廣東同廣西。

中醫點睇？

桑寄生味苦、甘，性平，歸肝、腎經，功效相當多，包括補肝腎、強筋骨、祛風濕及安胎元，多用於對付肝腎虧虛之腰膝痠痛乏力。據中醫藥典籍《日華子本草》嘅記載，桑寄生有「助筋骨，益血脈」嘅功效，男人食咗，腰膝更有力，上到床自然更加揮灑自如喇！

點樣食法？

1.寄生五加酒

用相同分量嘅桑寄生、五加皮、杜仲，以約10倍分量嘅白酒浸泡約1個月，之後可飲用。桑寄生、五加皮有補肝腎、強筋骨、祛風濕功效，而杜仲亦可補肝腎、強筋骨、止腰痛，所以呢味藥酒可用於應對肝腎虛損、腰膝痠軟等問題。

2.寄生杜仲蛋

先預備桑寄生10克、杜仲10克、阿膠5克、雞蛋兩隻。先將桑寄生、杜仲加水煲滾，再放入阿膠煮至完全融化。另外，將生雞蛋敲破放入碗中，加入之前煮好嘅桑寄生湯汁蒸熟便可連湯汁食用。呢款食療有補肝腎、養血等功效，可以幫助男人滋補強身。