有性趣：益智仁補腎助陽治遺精

益智仁，又叫益智子、狀元果，係薑科植物益智嘅果實，廣泛見於廣東、廣西、福建等地，為中國南方4大中藥之一。

據明代李時珍著作《本草綱目》所記載：「遺精虛漏，小便餘瀝，益氣安神，補不足，利三焦，調諸氣。」前兩句嘅意思係指益智仁可以用嚟治療夢遺同遺尿，兩者都同腎氣不足有關。另外，佢對於改善夜尿頻頻、脾胃受寒或中氣虛寒有相當大嘅作用。

過往有人就益智仁喺改善性能力方面進行研究，方法係利用灌胃給藥嘅方式，畀小鼠服用唔同分量嘅益智仁水提取物，結果發現，小鼠嘅精子密度及精子存活率有所提升，精子畸形率亦有所下降！

可考慮煲益智仁粥，方法好簡單。準備益智仁（10克）同粳米（100克）。先將粳米洗淨，加水後以大火煮滾，再以細火慢煮成粥。益智仁則磨成粉末加入粳米粥，再煮5分鐘，之後落鹽調味就食得。但要提醒一點，陰虛火旺同大便秘結者，唔係太啱食益智仁，大家要留意啊！