宋丹菲舞林高手

唔少韓國模特兒都鍾意喺網上展現自己嘅才藝，好似跳舞同唱歌咁，但水平如何，真係見仁見智。不過對韓國人氣模特兒宋丹菲嚟講，佢嘅歌舞表演的確有水準，皆因佢喺大學主修舞蹈及演出藝術，所以表演唱歌同跳舞完全冇難度。

喺光州廣域市出生嘅佢，自細跟隨父母移居日本，高中畢業後回流返韓國讀大學，修讀現代舞、嘻哈、芭蕾舞及爵士舞，同時兼職做車模，喺光州一個汽車品牌舉辦嘅車展上首次登場，其迷人嘅樣貌同玲瓏浮凸嘅身材，不但成為展場上嘅焦點，同時燃起佢對模特兒工作嘅興趣，結果喺2013年佢以職業模特兒身份出道，又參與舞台演出，為大家帶嚟極具觀賞性嘅舞藝，而佢出色嘅唱功更係備受讚賞。唔知嘅話，仲以為佢係一位歌手添！