絲絲講場：內地火鍋市場今年望滾出逾6000億

舊時阿爸阿媽嗰代話秋風起，三蛇肥！依家新一代秋冬天唔係去食蛇羹，而係去「烚吓烚吓」打邊爐！講到火鍋，最近內媒就引述香港上市嘅內地大品牌海底撈(06862)喺今年供應鏈大會上發布嘅《2024火鍋行業創新報告》，指今年火鍋賽道嘅市場規模有望突破6,000億元人仔喎！

報告話，今年火鍋賽道呈現產品創新、點位創新、場景創新、模式創新、體驗創新5大維度。其中，產品創新居核心地位，係火鍋品牌喺當下提高競爭壁壘嘅基礎。

全國門店年增13%

監測嘅火鍋樣本品牌在今年推出新品超過300款，其中海底撈1至10月在全國推出新品21款，區域新品206款。而全國火鍋門店數目喺過去一年增長13.6%，意味着市場競爭持續加劇。

老實講，喺如今着重健康，講求清淡、原味嘅飲食文化，做火鍋最緊要食材、湯底、醬料新鮮好味，其他嘅就係飲料種類，同埋要坐得舒服啫，冇咩廚藝要求，相信鍾意食食吓有人喺側邊用麵粉條跳舞表演嘅食客只屬極小數。業界要時刻保持業務創新，真係少啲創意諗頭都搞唔掂！

絲絲睇番資料，海底撈今年上半年收入同盈利分別錄214.9億元同20.38億元人仔，截至6月底經營1,343家餐廳，做火鍋食肆做到咁大規模，真係唔簡單！

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：