昔日東方絲絲講場：悟空遊戲吸金30億 電腦配件炒貴幾成
近年內地不斷打壓遊戲行業發展，又限制未成年人打機時間、加設課金充值上限之類，結果搞到行業進入衰退期，好多遊戲公司都因為生意難做而裁員。不過，近日有隻單機遊戲橫空出世，上線短短幾日賣出過千萬份，以官方售價推算，吸金超過30億元人民幣，連帶近年每況愈下嘅電腦「砌機」基地—深圳華強北生意亦都突然火爆，好多電腦配件都炒貴幾成。
由內地工作室遊戲科學研發嘅中國首款3A級遊戲大作《黑神話︰悟空》，深受一眾內地玩家追捧，亦證明除咗課金抽卡嘅劣質手機遊戲，高質素單機遊戲都有龐大嘅市場。更重要係話畀所有人知，中國遊戲唔係淨係識抄襲、換皮、呃錢，而且遊戲亦可以帶動其他產業，經濟效益極高！
華強北砌機死場翻生
要知道最近幾年內地流行「消費降級」，好多人都唔會再大手筆「砌機」，是但買部文書電腦應付工作需求就算，作為最大電子零件集散地嘅華強北亦日漸沒落，估唔到一隻熱門遊戲，會令成個場起死回生，一時間人人都為咗打機而升級電腦配置，過去滯銷嘅電腦顯示卡、CPU統統炒貴晒。
有華強北商戶甚至透露，一啲熱門款嘅顯示卡售價比平時貴咗20%，而每部PlayStation 5遊戲主機都賣貴幾百蚊，而且仲要供不應求，一開門就排隊入嚟掃貨。而專做電子產品嘅電商平台京東(09618)就話，《黑神話》上線之後，遊戲設備成交額增長超過5倍；遊戲電腦成交金額亦增長過一倍。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
