絲絲講場：原名「肥西老母雞」 老鄉雞擬港上市?

嗱，絲絲作為一位淑女，平時聽到粗口都會打冷震，所以「肥西老母雞」絕無任何不雅含意，外省人更加唔明有咩問題。之所以會有呢個名，係因為呢個品牌來自安徽省合肥市嘅肥西縣，主打經典菜式「肥西老母雞湯」故而得名。第一間「肥西老母雞」快餐店喺2003年開業，並且逐漸走向全國；2012年進行品牌升級，正式改為現名──老鄉雞。

雖然老鄉雞喺香港未有分店，但由於佢前身「肥西老母雞」品牌享負盛名，唔少香港人都有所聽聞、網上亦不時有人分享呢間餐廳嘅圖片，討論熱度高踞不下，就算米芝蓮餐廳都冇咁多人關注。

其實老鄉雞過去曾經多次試圖喺A股上市，但最終未能成事。有內地傳媒亦引述「相關人士」話赴港上市係假消息。不過就算唔上市，都希望佢可以學海底撈(06862)開番間香港分店，畀大家見識一下招牌菜「肥西老母雞湯」！