絲絲講場：比亞迪招聘火熱 一日收12萬份履歷

近日就傳出，今年賣新能源汽車成績彪炳嘅龍頭車企比亞迪股份(01211)，業務呈「爆發式增長」，當然好等人用，9月25日宣布咗啟動秋季招工，但只接受網上投遞履歷表。有網民以投遞編號作推算，發現翌日已收到12萬份履歷表，可見招聘活動反應熱烈。

畢竟比亞迪係內地戰略車企，盈利錄得增長之餘，依家積極發展海外業務，喺年輕人眼中係明星級企業，亦提供到發展機會，想加入謀份優差都好正常。據比亞迪舊年嘅年報資料，截至舊年底其員工總數為約57萬人，其中碩士及以上學歷逾1.1萬人，本科學歷逾6.5萬人。隨着汽車智能化發展，相信未來需要更多工程及科技人才加盟。

所以幾時都話，唔同時代會有唔同嘅人力資源需要，無論經濟處於咩周期，都係需要人才去配合發展，年輕人升學若然揀啱科讀，都相信比較容易搵到工作機會！