絲絲講場：海底撈執行新規 禁客單點清水鍋

再睇番內地網友啲片啦，原來以前啲客人鍾意叫全清水鍋，除咗係因為唔想畀湯底錢之外，最重要係客人可發揮自己嘅創意，用店入面免費嘅香料、醬料、調味料自製湯底。例如檸檬、辣椒、蒜蓉、糖、鹽、芝麻、沙茶醬之類都係主打，點樣搭配真係變化無限。唔一定好味，但一定好好玩，因為可以拍片上載社交平台，同人講點樣溝出新美味、發掘「隱藏食法」、點樣食到盡，其中有個網友就話，只係用咗17蚊人仔就食到飽，仲要打包好多花生、水果同埋牛肉粒返屋企添。

今次新規定，睇番內地討論區嘅反應啦，都有人好似絲絲咁，今日先知原來以前可以叫全清水鍋。雖然都有網友覺得點咩湯底係客人嘅自由，但就更加多網友幫公司講好說話，話做生意唔係做善事，以前畀大家鑽空子鑽咗咁多年，大家都着數咗好多年啦。

講番海底撈，舊年上半年轉虧，蝕咗2.66億元（人民幣‧下同）。公司上月底發盈喜，預計舊年全年收入不低於3.46億元，按年倒退不超過15.8%；料錄淨利潤不少於1,300萬元，主要係注銷從公開市場及以要約收購方式回購嘅2026年票據時確認收益3.29億元。總之，喺內地做飲食生意，真係唔易做！