絲絲講場：內地瘋狂搶AI人才 出手闊綽月薪10萬

絲絲就聽聞，內地各界正在瘋搶AI人才，內地多家科技大廠嘅招聘網站，以「PT（預訓練模型）」、「NLP（自然語言處理）」、「AI演算法」等關鍵字搜索，發現阿里巴巴(09988)、騰訊控股(00700)等最近都發出大量聊天AI相關職缺嘅招聘。當然，中小型科企亦唔輸蝕，紛紛加入搶人行列，部分相關職缺開出嘅月薪，最低月入兩萬元人民幣，最高達10萬元人民幣。所以話，雖然明年先進入曆法嘅「九運」，但啲與「火」相關電子行業行情已經開始熱爆，睇怕未來20年電子科技行業嘅從業員會迎來「工搵人」嘅大旺景！

早前絲絲講過，美國大學最搵錢「神科」排名出爐，最賺錢嘅唔再係醫科法律，而係STEM（科技、技術、工程、數學）相關嘅學科。所以話，呢個科創年代，有冇大學學位唔係最重要，最緊要有門當時得令嘅技術喺手，精嘅話自學成網絡「黑客」都大把科企爭住請；至於文科生轉型唔成功，唔係賺多賺少問題，係被機械人搶飯碗，冇得撈呀！