昔日東方絲絲講場：滙豐港Banker不滿無房坐？
事隔3年，港人終於可以同口罩講拜拜，生活回復正常！不過，絲絲相信步入疫情後時代，唔少公司仍繼續採取彈性上班安排或者混合工作模式，順便慳番辦公室營運成本嘛。市傳滙豐控股(00005)香港會逐步轉用開放式辦公室，唔知係咪咁多位銀行家（Banker）都要一齊坐「豬肉枱」呢？
憂轉開放式辦公室無私隱
屹立喺中環嘅滙豐銀行總部大樓正在裝修，外媒引述消息指，裝修完後，部分資深銀行家可能會冇咗私人辦公室，引起部分人不滿，呻高層經常要同客戶討論敏感資訊，擔心轉用開放式辦公室或引發私隱問題。但報道指，仍會有一啲會議室畀員工聚埋一齊討論敏感資料。
查實滙控倫敦總部兩年前已採取類似措施，當時集團取消咗行政人員樓層，行政總裁祈耀年同其他高層一齊輪住用辦公枱（hot-desking），據佢當時解釋，滙控高層超過一半時間需要到世界各地出差，形容辦公室半數時間空置係「資源浪費」。
祈耀年早前喺業績發布會亦講過，會繼續改善效益，進一步精簡架構及數碼化。滙控發言人表示，會適時改善辦公室空間，為員工提供更大靈活性同選擇。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
