絲絲講場：美畢業生做咩工最無「錢」途？

據調查，墊底嘅係主修神學及宗教嘅畢業生，畢業後頭5年嘅年薪中位數得36,000美金（約28.08萬港紙），平均月入3,000美金（約23,400港紙），跟隨其後嘅係主修社會服務、家庭和消費者、心理、酒店及休閒管理、表演藝術、幼兒、小學、特殊和各類教育科目，呢啲專業嘅學生畢業5年平均年薪都唔夠40,000美金。相對於全美大學畢業5年嘅平均年薪中位數係46,500美金，上述呢10個專業要低6,500美金。

收入最高嘅專業都喺STEM領域，即科學、技術、工程和數學等，化學工程以75,000美金居首位，電腦工程、電腦科學同埋航天工程年薪中位數亦逾70,000美金。

北望神州，諮詢機構Mycos調查顯示，內地2021年畢業大學生投身社會一年，平均月入5,833人仔（約6,573港紙），已經係近10年最高，當中只有6.1%應屆畢業生月入過萬元。收入最多嘅行業都係資訊傳輸、軟件和資訊技術服務業同埋電子電氣設備製造業，分別係6,781人仔及6,508人仔。

無可否認，市場對於STEM需求更大，但絲絲覺得應該讀自己喜歡或擅長嘅，事關都要畢到業先至有職場應徵機會。