絲絲講場：Hermès收入破頂 打賞每位員工3.3萬

絲絲睇番Hermès舊年業績，全年收入大增29%至116億歐元，就算剔除匯率變動嘅影響，增幅依然有23%，相當唔錯。要知道，歐洲到依家都仲打緊仗，俄烏戰爭已持續一年，加上能源危機、通脹、加息，簡直係一鑊泡，Hermès業績真係好好！睇埋分項數據，亞太地區（除日本以外）舊年收入增長按固定匯率計都有21.9%，公司仲話大中華區嘅銷售額依然持平，似乎都唔多見受疫情影響。

業績表現咁好，自然要獎勵吓員工。雖然每位員工派3萬蚊港紙都唔算少，但比起Hermès官網上面動輒5萬、6萬蚊一個嘅手袋，又的確唔算多（實體分店會有平啲嘅款式）。不過，公司審慎理財，對股東嚟講都係好事嚟。