絲絲講場：美團外賣進軍香港

同美團送外賣嘅首要條件就係香港工作嘅資格，步兵同踩單車門檻16歲，電單車車手就18歲。送餐模式分兩種，「即時上線」就係你隨時Online等單接，「預約時段」就係喺預約時段蒲頭，接單機會大啲，可以賺多啲，送遞員收入由「配送服務費」、「活動獎賞」同「組別獎賞」組成。

官方仲未宣布美團幾時正式喺香港提供服務，只係叫大家留意住個TG，相信要幾個月時間。為吸引送遞員加入，美團開出特別迎新獎賞，頭14日每單會有額外獎賞，頭19單以內每單醒多你5蚊，第20至59單每單醒多6蚊，第60至99單每單再醒多8蚊，第100單同之後仲每單醒10蚊，14日完成目標單量可「額外再賺$2,500」。有指依美團嘅出價，車手最高月入可達3.5萬元。美團官網至今有20張請人通告工作地點係香港，集團董事長王興講過，香港係發展全球業務嘅試驗場，睇吓打唔打得響頭炮啦！