昔日東方絲絲講場：法紅酒滯銷 改製搓手液
做生意要靈活變通呢條鐵律，全球通用。法國係紅酒生產大國乃人所共知，但近年法國人對紅酒嘅消費量逐漸減少，加上呢幾年新冠疫情肆虐，供應鏈斷裂，啲酒運唔到出去賣，海外需求亦下降，最終要當地政府諗計幫釀酒商去庫存，咁當然唔係倒落海啦，而係將紅酒由飲料變成其他用途！
去年以來，雖然全球唔少地方重啟經濟，但法國紅酒依然有好多積壓，部分庫存去到24個月。據法國全國農民工會聯合會數據，70年前每名法國人平均每年飲130升葡萄酒，至今大幅跌70%去到40升。去年法國超市紅葡萄酒銷量亦下跌15%。法國以外地方對紅酒需求雖有上升，但升幅非常有限。
政府資助酒農去庫存
始終紅酒係有賞味期限，而且每年都有葡萄收成要處理，但符合溫濕度嘅酒窖亦都唔係無限大。故促使法國政府今年再加碼1.6億歐元，幫助酒農去處理過多嘅積壓，將紅酒變做工業酒精，改用喺美容化妝、製藥行業，如酒精搓手液等。
不過，唔少酒農都嫌資助太少，喺著名釀酒區波爾多最近就爆發示威，酒農要求不如政府資助將部分葡萄園連根拔起以減產，重新利用土地，從而換取政府補償每公頃一萬歐元，涉及面積或者達到2.1萬個足球場咁大！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
