絲絲講場：「迴轉壽司惡作劇」竟有受惠股

一眾壽司店生意點都要做，壽司郎嘅處理方法包括畀食客揀用獨立包裝嘅調味料同餐具，濱壽司同藏壽司就話考慮用人工智能（AI）同監察鏡頭，防止有食客搗亂。思佰益證券餐飲業分析師田中俊就警告，迴轉壽司一向賣點係平，好難點加價，家陣又使一大筆錢，萬一維唔到皮，迴轉壽司隨時走入歷史。

又係嘅，就以元氣為例，舊年12月底9個月嘅毛利率56.9%，望起上嚟幾巴閉啊，扣埋一大堆經營開支，經營毛利率得3.2%咋！

花旗分析師大場周平（音譯）就覺得，廉價又好味嘅壽司長遠點都會有增長，問題係迴轉壽司誕生嘅時候啲人無得玩抖音，成本好可能會因為防止搞事嘅開支而上升。

不過，小財唔出，大財點入呢！可以挽回食客信心，花少少錢有咩所謂吖！難怪資金炒監控設備股都發到達，其中JVCKenwood股價上個禮拜五再升超過8%，短短4日夾埋累飆逾16%。乜東東嚟？咪汽車音響嗰間Kenwood囉！