昔日東方絲絲講場：亞洲高級賓架份糧隨時冇一半
舊年個市有幾差，大家有眼睇，早幾年好景時全球投行爭崩頭咁「搶人才」，依家都要節衣縮食做成本控制。唔少華爾街投行已經「搶人裁」或者縮減獎金池，有外媒指美資投行亞洲區高級Banker（賓架）舊年薪酬連同獎金待遇，恐怕係2008年金融海嘯以來最差，當中高盛、摩根士丹利同埋美銀嘅董事總經理（MD）級別員工，份糧閒閒地都要唔見40至50%！
事緣亞洲區內交易量大減，一眾Banker份糧都凍過水，高級董事總經理嘅薪酬降至介乎80萬至150萬美金，初級董事總經理薪酬人工亦縮至60萬至100萬美金。部分表現最Top嘅Banker，份糧都要跌兩成；表現麻麻嘅，份糧隨時蒸發六至七成，聽講當中好多人都冇份拎獎金。
滙控基層員工傳加薪3%
舊年美資投行嘅中國業務，受內地加強行業監管，同埋「清零」防疫政策影響，加上當局又限制內地企業向海外售股，令到相關交易下跌88%。今個月起炒3,200人嘅高盛，舊年9月已經喺亞洲炒咗兩轉，同大摩一樣專向涉及中國市場嘅Banker開刀。
但並非所有人都要過苦日子，花旗集團早前傳對初級投資銀行家加薪15%，以挽留人才。至於滙豐控股(00005)有傳檢討緊2023年度整體薪酬預算，高層固定薪酬變動唔大，但基層級別員工固定薪酬總額預算獲增加，加薪幅度或達3%。
滙豐發言人回應指，一直以來該行薪酬政策旨在吸引、激勵同埋挽留人才，並會根據業務績效、員工表現等因素，並參考市場薪酬水平，制訂具競爭力嘅薪酬方案。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
