昔日東方絲絲講場：譚仔三哥新宿店突裝修惹揣測
作為香港飲食知名品牌嘅譚仔國際(02217)，憑藉日資股東嘅脈絡支持，舊年3月進軍日本市場，初期大受歡迎，分店經常出現人龍。不過，旗下品牌「譚仔三哥米線」位於日本首間分店嘅新宿中央通店，開業未足一年，近日透過社交專頁宣布因「施工原因」，2月起休業，初時未見交代何時重開，遂引起食客同股民嘅關注，更引來可能與「生意不似預期有關」嘅揣測。
公司預期2月底重開
其後，公司就回應，預計新宿分店將於2月底重開，確實日子適時公布，但未有交代突然需要進行內部工程嘅詳細原因。
唔少譚仔嘅客，都係食開有鋪「癮」，絲絲係其中一個。譚仔當然了解客戶需求，話由於「新宿可能會擠滿忍唔住想食米線嘅人，請喺出現戒斷症狀之前，到惠比壽店或吉祥寺店補充米線成分」；又話「所有員工都期待與『譚粉』重逢」。從1月25日至31日期間，食客只要光顧新宿嘅譚仔三哥，將會獲得惠比壽店和吉祥寺店8折優惠券，真係幾識做生意喎。
其實，據報譚仔一度計劃2024年3月底前喺日本東京開25間餐廳，當時估計每家新店連按金，平均成本為590萬元，惟因去年疫情，以及日本缺工問題影響，搶高咗工資，影響資本開支預算及投資回本期，公司去年公布中期業績時話，已調整日本業務嘅擴展步伐。相信公司嚟緊會先着力提高品牌知名度，再按部就班喺海外擴展分店網絡。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
