絲絲講場：南韓「泡菜赤字」創4年高

南韓一向都有「泡菜大國」呢個美譽，之不過，當地海關日前公布嘅數據就顯示，以金額計，舊年全年泡菜進口額反而多過出口額，變相出現近3,000萬美元貿易逆差，令人嘖嘖稱奇！

咁點解出現呢個奇景？之唔係錢作怪囉！話說舊年全球通脹肆虐，就連國產泡菜原材料價格都「步步高陞」。數據顯示，當地舊年「自家製」泡菜出口每噸高達3,425美元（約2.67萬港元），相反進口泡菜就平一大截，盛惠643美元（約5,015港元）。

去年貿易逆差擴至2.2億

如是者，舊年泡菜進口額按年勁升20%，見1.69億美元嘅史上新高；相反，泡菜出口額就時隔7年再度下滑，按年大跌11%至1.4億美元，連帶貿易逆差擴闊至2,858萬美元（約2.22億港元），創2018年來最大，可能係因為產品價格太高，缺乏競爭力！

至於單睇南韓泡菜銷往各地嘅表現，就以日本最勁，金額為6,100萬美元；香港亦榜上有名，排喺第3位，出口金額有727萬美元，折合逾5,600萬港元。

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：