昔日東方絲絲講場：星洲人加碼派電子利是夠疏爽
每逢過年派利是係華人傳統，今個新年終於冇咗社交距離限制，大家可以放心四圍去拜年同埋收利是。不過，呢幾年疫情培養市民使用電子支付嘅習慣，唔少金融企業都響應環保推廣電子利是，所以都多咗市民選擇派電子利是。
金額增多達三成
好似唔少華人聚居嘅新加坡，當地3家銀行話，多咗新加坡人喺年三十及年初一派電子利是，涉額按年增長達到三成咁多！
新加坡傳媒引述星展銀行指，使用eGift功能直接轉帳嘅電子利是金額及用戶人數按年增加30%，平均發出嘅電子利是金額亦增加三成至120新加坡元，即係成714港元，都幾闊綽，或多或少反映舊年新加坡經濟真係好好，搵到錢派利是自然疏爽！至於使用該行前年推出嘅QR Code利是用戶人數按年亦增加三成，充值金額按年增加四成，至500萬坡元（約2,975萬港元）。
華僑銀行指年三十及初一期間交易量係每日平均兩倍以上，金額亦係日均交易近5倍，預計今年農曆新年期間電子利是數量將按年增加至少兩成。大華銀行則透露，期間電子利是金額按年增一成，交易量則保持平穩，期間經常轉帳嘅數額為100坡元（約595港元）。
到底新加坡人點睇電子利是？當地受訪市民就話，今年可以親自拜年，傾向派實體利是，但仍然會喺特定時候派電子利是；亦有市民直言：「因為封畀親戚朋友嘅利是銀碼有啲大，擺唔入利是封，所以咪畀電子利是囉。」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
