昔日東方絲絲講場：「女股神」撈Tesla輸鑊甘遭恥笑
回顧過去咁多年，每逢股市暢旺、牛市行情之下總會有一堆「股神」湧現，呢班人往往會被捧為「少年股神、民間股神、散戶股神、新世代股神、中國股神等……」只不過多數「股神」其實都經唔起時間考驗，好快就跌落神壇。近年一度迅速冒起嘅「科技女股神」伍德（Cathie Wood）亦面臨相同命運，最近更因為不斷撈特斯拉（Tesla）股票，結果愈溝愈淡、愈輸愈多，喺外國論壇淪為一眾毒舌網民嘅笑柄……
伍德主張嘅投資策略，就係押注「顛覆型創新」主題，即係某程度上能夠喺各方面「改變世界」嘅創新型公司。佢嘅成名之戰，正正就係「長揸」Tesla股票，結果由佢創立嘅方舟投資（Ark Investment）旗下多隻交易所買賣基金（ETF），喺2019年美股牛市行情期間大放異彩，一戰封神。
可惜「成也蕭何、敗也蕭何」，由於聯儲局加息引發嘅科技股大冧市，令伍德所管理嘅基金損失慘重，其中，Tesla股價過去3個月累跌逾四成，一年來累積跌幅更接近六成。
月內加倉逾億美元
不過，巨額虧損未有令伍德收手，最近一次喺周三再買入49,983股Tesla，以當日收市價計總值643.68萬美元（約5,020萬港元）；由月初至今共買入80.66萬股Tesla，累計加倉過億美元。
由於投資失利，伍德管理嘅Ark Innovation ETF（ARKK）基金價格繼續低位徘徊，現價相較2021年2月歷史高位159.7美元累跌78.21%，唔少「中伏」嘅外國網民都用「惡搞圖」嘅方式喺網上諷刺佢，用幽默方式抒發情緒。不過，伍德依然少理外界批評，仲叫大家畀多5年時間佢，時間會證明一切咁話喎。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
