昔日東方絲絲講場：中金變燈神 10大預測錯9個
究竟大行報告係瓣瓣準嘅「明燈」，抑或無樣準嘅「燈神」？近日有內地網民對本港上市嘅中金公司(03908)翻舊帳，直斥佢之前公布嘅「2022年度10大預測」貨不對辦，對照去年實況「10個錯足9個」，仲質問中金作為投資銀行翹楚，點樣提高研究能力？中金就回應話，「經濟及市場發展存在不確定性」，即係話，預測還預測，投行唔係「神仙」，冇「水晶球」，冇話「包準」囉！
解釋「市場有不確定性」
話說市場流傳一幅圖片，羅列中金對去年作出10大預測，但結果係，佢哋所估嘅商品市場趨弱、增長股跑贏價值股、北向資金淨流入逾3,000億元人仔、電動車及新能源行業高景氣擴散等9大預測「一律仆直」，得番「債務問題喺2022年仍值得重視」成功應驗，惹來內地網民揶揄，「大行做嘢冇樣準」之餘，仲直接質問中金嚟緊打算點樣提高研究能力！
如是者，中金又點拆呢個虎年預測遺留落嚟嘅「炸彈」呢？公司發言人話，舊年地緣衝突等非經濟因素進一步複雜化問題，令經濟同市場發展有不確定性，而報告呈交嘅觀點只係畀投資者參考使用，唔構成投資推薦同埋操作建議。
佢哋仲講明，研究係公司業務重要基礎，強調發布嘅研究報告係靠獨立、客觀數據分析，嚴格按照監管要求履行質量審核同合規審查流程。
照咁睇，大行不妨倣效輪商，喺報告最尾加番「水蛇春」咁長嘅「免責聲明」，始終預測嘅嘢，「信不信由你」，冇包生仔呢回事，估十樣十樣都全中嘅話，全職投資搵真銀好過啦，仲使喺投行做分析咩！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
