絲絲講場：日女主播轉職基金經理勁掂

麻衣子1974年喺東京出世，大學畢業後第一份工係去日本富士電視台做主播，但據講佢好快發現面對公眾嘅壓力好大，而且上司分派工作嘅原則係取決於主播受歡迎程度，而非經驗同專業知識，所以佢2001年決定離開電視台，去史丹福大學商學院進修。

「回爐重造」之後，麻衣子2005年加入富達投資做房地產同汽車行業分析師，4年後過檔老竇宇田豐喺2002年創立嘅資產管理公司Evarich，兩父女一齊打江山。

行業數據機構CityWire統計，舊年Evarich資管旗下日本成長基金回報達到16%，大幅跑贏舊年跌半成嘅東證指數，該基金喺日本股票基金市場排名第5，超越97%同行。呢份成績表足以令麻衣子成為日本罕見嘅女明星基金經理。

實際上，選擇成為基金經理嘅女仔依然佔少數，據晨星2021年報告，全球基金經理中只有14%係女性；而日本金融廳舊年報告亦顯示，大型資管機構高層職位中，女性佔比不足一成。麻衣子都不諱言，基金經理係男性主導嘅行業，好多時開會，佢都係在場唯一女性，但令佢最感激嘅係，呢行評價能力方式完全係基於業績表現，而非性別。

日本央行啱啱議息完，專業嘅麻衣子就覺得，日央行兩年內會將10年期國債孳息率上限加到去1.5至2厘，大家參考吓啦。