絲絲講場：財圈利是封鬥花心思

雖然近年因應環保而少用生肖做設計，但兔仔夠得意，唔少公司都印兔年專用利是封順道宣傳寶號。瑞信利是封配有「玉兔呈祥富滿堂　瑞氣盈門福祿臨」對聯；瑞信輪證用橫封設計，兩隻兔仔中間印上「兔年吉祥」，夠可愛。

安聯投資就大玩「隱形兔」，喺萬花之中你又搵到幾多隻？新鴻基地產(00016)旗下樓盤瓏珀山嘅三連兔，動感十足，好似預祝拎「飛躍進步獎」；另一個樓盤University Hill行簡約風，橫睇仲有少少似蝴蝶，下年用番都得呀！至於NOVO LAND卡通公仔印滿利是封，完全感受到過年嘅熱鬧氣氛。

傳統風格亦有市場，外資投行瑞銀嘅利是封同往年一樣色彩斑斕兼大玩中國風，共有3款，印上麒麟、鹿或鶴，分別代表「福星高照」、「祿運亨通」及「壽山福海」，夠晒意頭，聽聞二手平台仲開價680蚊10個，有價有市。富達利是封用上風車、銅錢、梅花等圖案，組成一個「富」字，外形仲有啲似桔，祝福一眼就估到，仲送上利是袋，唔怕啲利是周圍飛。

瑞銀同富達利是封有長封同短封揀，兼且用上FSC（森林管理）認證紙，即是造紙嘅木漿來自可持續發展嘅森林。如果遇上婚禮、壽宴等，重用呢款利是封都得，夠晒ESG（環境、社會及管治）。

有啲公司玩食字，有一套兩款利是封分別印上「嘉肥屋潤、「富貴榮華」；另一間公司印有「發財拿拿聲」；六福集團(00590)可能會俘虜到唔少女士嘅心，事關封底印有優惠二維碼，收到利是錢做咩好？明晒啦！

好事要成雙，私人銀行UBP各有一隻孔雀，貝萊德就左一隻醒獅，右一隻醒獅，派嗰下一定零舍醒神，派雙封就可以湊齊一對。

收到靚靚利是封當然開心，但原來利是封本身都有「身價」。好似滙豐私人銀行利是封，喺網上放售，索價700至4,000蚊都有，大家覺得呢啲咁高貴嘅利是封，要封幾多錢入去先叫「相襯」呢？