產經

絲絲講場:教子女理財 由利是開始

家長可藉利是錢培養小朋友嘅「財務智商」。 家長可藉利是錢培養小朋友嘅「財務智商」。
家長可藉利是錢培養小朋友嘅「財務智商」。
農曆新年就快到,小朋友最開心當然係收利是啦,畢竟零用錢「多多益善」。不過,有唔少家長擔心小朋友會亂使錢,所以好多時都係一句「等阿媽幫你儲起佢」就拎走晒啲利是錢,然後留下只有思念……講真,與其沒收子女嘅利是錢,倒不如趁機教育佢哋正確理財觀念。最近投委會就推出咗一份「新年錦囊」,向各位家長傳授心得,培養小朋友嘅「財務智商」。
父母身教最重要
首先,投委會整咗個網上理財遊戲「錢家賀年3件事」,趁新年假期畀小朋友挑戰各種賀年理財任務,包括將正確金額放入利是封、快而準地計算全盒小食價錢,寓學習於娛樂。另外,家長亦可以同小朋友一齊拆利是,幫助佢哋透過實物鈔票認識香港貨幣,熟悉唔同貨幣種類、顏色或形狀,從而分辨「多錢」、「少錢」嘅概念。
更重要嘅係,家長需要適時放手,將利是錢交由子女負責,等佢哋學習自己理財。其中一種做法,係按照「財分3份」嘅原則將利是錢分為「儲蓄、分享、消費」,制訂一啲簡單嘅預算計劃。其中一項實用工具,就係投委會網站上專為小朋友而設嘅「利是錢收支計算機」,步驟簡單易用,方便計算利是收入同計劃開支。
要教小朋友儲錢,培養佢哋嘅興趣同目標都好重要,可以由玩具、零食等「貼地」嘅小目標開始,訂立儲蓄期限,鼓勵佢哋持之以恒咁儲錢。最後,父母亦當然都係要言傳身教啦!有調查顯示,有77%嘅小學生都係透過父母學習理財,所以各位父母都應以身作則,減少衝動消費,做個好榜樣。
余絲韻
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500