絲絲講場：中石通告玩「留白」 靠網民出手破解

本來就係最正常不過嘅公告，點知喺網頁上直接打開，入面雖然無亂碼，但差唔多每段每行都有空白位，見得最多係括號同其他標點，文句斷斷續續，唔知佢想點。

不過，廣大嘅網民頭腦仲勁過名偵探柯南，呢啲睇落似密碼嘅嘢好快就被破解。方法就係將佢copy and paste（複製與貼上）去一啲文書系統度，就見到之前空白嘅地方講啲咩。原來係主席鍾靈、執行董事吳禕杰、非執董簡智明、獨立非執董Warren Lee Primhak和李海波辭任。突然之間咁多人跳船，大家自己解讀啦，但公司梗係循例話呢班人同董事會無任何意見分歧啦。

總共5個人走，然後公司就委任番3個人入董事局，但最終唔夠腳去符合上市規則，需要再物色其他人；公司股份就繼續停牌。

睇嚟今次都係電腦技術上嘅一啲bugs（漏洞），希望公司除咗盡快改善之外，日後喺出通告之前，都要試清楚、睇清楚，免得造成混亂兼嚇親人就唔係咁好啦。