絲絲講場：UNIQLO日員工加薪最多40%夠和味

迅銷話，每位員工未來嘅薪酬將根據工作績效掛鈎，大學畢業生嘅月薪起薪點將由25.5萬日圓增加到30萬日圓（約14,700港元加至17,700港元），升幅約18%；分店經理起薪點由29萬日圓增加至39萬日圓（約17,100港元加至23,000港元），增幅約36%，另有部分員工年薪將提高多達40%。

其實，迅銷早喺2020年曾調整部分全職員工嘅起薪，舊年9月亦已調升兼職員工嘅薪酬，時薪平均上升約20%，而今次宣布自3月起全面加薪嘅決定，將成為公司過去逾20年來首次，目的係要拉近同歐、美服裝市場嘅差距，預計呢次加薪會有約8,400名員工受惠，真係飲得杯落。

講起加薪，尋日絲絲喺社交平台見到本地飲食集團揸弗人黃傑龍發文話收到公司人事部發過嚟嘅加薪信，加幅4%。4%同40%，係差好遠喎。不過，黃公子作為公司股東，利潤分紅應該比份月薪更和味嘅。對唔少香港打工仔嚟講，加薪4%都算唔差，皆因呢幾年疫下唔少人不但冇人工加，仲要減薪！希望新年進步，老闆賺到錢，與員工分享成果，一年比一年好啦！