絲絲講場：長榮海運台灣員工傳收50個月花紅

入職私人機構最大好處，莫過於花紅可高達數以十個月計。不過，唔係個個行業都咁幸福！就以呢個年關為例，台灣長榮海運據報向台灣員工派50個月花紅；反觀英國超市Tesco僅向員工派盒「花街朱古力」，雖然好過乜都冇，但兩者待遇都真係天與地！

受惠疫情下供應鏈緊張，航運業呢3年業績「發過豬頭」，其中全球第6大海運公司長榮海運去年收入激增至破紀錄嘅6,346億元新台幣（約207億美元），據報最新向部分員工發放50個月工資的年終獎金，相當於4年幾嘅人工，以慶祝公司期內卓越表現。不過，據報上述花紅僅適用於有台灣合約嘅員工，所以隨即惹來上海員工詐型，指佢哋年終獎金只得月薪5至8倍，待遇不公。至於同系長榮航空更只派一個月年終花紅，可見同一個集團，唔同部門份花紅真係好大分別！

英超市Tesco僅送朱古力

另方面，市傳英國超市巨頭Tesco最新向員工派一盒售價5英鎊（約47港元）嘅「花街朱古力」作為聖誕花紅。原來公司喺去年度報告已經提到，早喺2019年經已與工會達成協議，取消以往每年3月發放嘅現金花紅，以換取為員工加薪。咁員工有盒朱古力食吓，都算係賺咗喇！

余絲韻

「東網Money18」fb專頁：有討論、有分析，齊來FUN享，贏盡●你Like

Money18更多即時港股指數資訊