絲絲講場：小加滴灌通獲創投睇好 望做華未來百強獨角獸

獨角獸企業意指成立不到10年，但估值達10億美元（約78億港元），且未喺股票市場上市嘅公司，簡單啲理解就係好短時間內發展成為大型企業。滴灌通主要藉數碼平台，將國際資金引流至內地小微企業，千萬唔好睇小呢啲細公司，喺14億人口嘅神州大地，從每人身上賺一蚊，都已經係14億元嘅大茶飯。

正所謂「創業難，守業更難」，莫講話要做獨角獸企業，要生存落去都要有啲料先得，何況現時市況疲弱、息口高企，經濟又有下行壓力，做生意並唔係咁容易。滴灌通唔單止為自己創造生意，同時為小微企業解決融資難嘅問題，而投資者又有回報，可以講係創造多贏局面，既符合國策又滿足商機，難怪上個月滙豐向滴灌通提供2,500萬美元資產抵押貸款，支持用創新嘅解決方案支援被資本忽視嘅實體經濟！