絲絲講場：華失鬥「芯」唔想燒錢

國庫用空虛嚟形容未免太誇張，但手緊應該係真，舊年下半年核酸檢測公司被拖數嘅消息引起社會熱議，況且內房危機令賣地收入大減，官媒尋日先唱《着力擴大國內需求》，又係錢。

點解燒錢換嚟嘅成果未如人意，深層次嘅問題在於你求嘅係「彎道超車」，要追嘅技術一大籮，而且人哋唔會企喺度畀你追趕，三星電子前高層、南韓國會議員梁香子早排先話依家打緊「晶片戰」，南韓要憑技術換取地緣政治籌碼，日本首相岸田文雄亦都話要喺半導體等領域同民間合作「大膽投資」。所以歷史學家、《Chip War》作者Chris Miller擔心，你燒錢整樣嘢出嚟，人哋已經用緊更先進嘅嘢，欠缺專門技術有錢都無用。

14億人嘅智慧，大概總會諗到辦法嘅，要嘅係時間。不過，舊年接連有要員被查嘅國家集成電路產業投資基金（大基金）恐怕會失寵，咁所謂其他辦法係咩？據講其一係要求本地半導體材料廠商「鬆章」幫人慳錢喎，咁到底對廠商係鼓勵定懲罰，振興產業之路何去何從，就要放長雙眼等着瞧。