昔日東方絲絲講場：投委會測消費心理 教節日濕平點至精明
臨近聖誕節，一出街就有各式各樣購物優惠宣傳，難免「心郁郁」，唔買都睇吓，睇吓就買埋，喺誘惑下要控制衝動真係好難啊！投資者及理財教育委員會就整咗個小測試，度下你嘅消費心理防線。
以下呢4組節慶消費優惠關鍵字，究竟邊組最打動到你？唔准諗，即刻答！A. 節日限定；B. 海外直送；C. 會員優惠；D. 買滿即享。
揀A嘅朋友可以話係「節日之鬼」，好注重「儀式感」，不過假日要盡興，使錢亦要使得精明，記住要理性消費呀！至於B，雖然搜羅海外商品，可以有更多樣化選擇，但各大平台都有差價，記得要貨比三家，同比較埋運費啊！
揀C嘅就要小心啦！做會員攞優惠好似幾着數，但有無用「精明眼」睇清楚條款先？係咪無條件入會？有冇會費、額外費用？正所謂「惡魔藏在細節裏」，一定要望真啲！
記得格價 諗好先買
答D嘅朋友，想透過消費換取額外收穫？諗清楚買嘢嘅目的未啊？如果買凸咗本身唔想要嘅嘢，就好浪費㗎喇！記住要諗清楚先好買，咪做大嘥鬼。
投委會提醒大家，「心動唔等於要立即行動」，「濕平」嗰陣，不妨計劃好啲，格好價、諗好先買！咁樣慳多幾個錢，儲蓄理財又點會難到你呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
